Graduation Projects for Embedded Systems - مشاريع تخرج مجال الأنظمة المدمجة

 

 

لو هنتكلم عن مشاريع التخرج، وخصوصًا في مجال الأنظمة المدمجة. 

الموضوع ده بيعمل صداع لطلبة كتير: نختار إيه؟ نبدأ منين؟ نعمل حاجة جديدة ولا نعيد فكرة معمولة قبل كده؟ خلينا نفصّل مع بعض.

1- أول مشكلة: اختيار الفكرة

أغلب الفرق بتضيع وقت طويل جدًا في اختيار الفكرة. نقعد نجيب من الشرق والغرب: Embedded + AI، Robotics، IoT… وفي الآخر يا إما نختار حاجة صعبة جدًا ما نعرفش نكملها، يا إما الدكتور يفرض علينا فكرة.
الحل؟
حددوا ديدلاين لاختيار الفكرة.
ما تسيبوش نفسكم لشهر أكتوبر ولسه بتتخانقوا على المشروع.

2- الهدف من مشروع التخرج

مشروع التخرج مش دكتوراه ولا اختراع عالمي. الهدف الأساسي:

• تتعلم حاجة جديدة فعلًا.

• تملى بيها السي ڤي.

• تعرف تتكلم عنها في الإنترفيو.

لو هدفك أكاديمي → اختار فكرة ينفع تكمل عليها بحث علمى.
لو هدفك بزنس → ممكن تفكر في ستارت أب وأنصحك بلاش وانت مش معاك الامكانيات اللازمة لده وده نقاش يطول.
لو هدفك تكنيكال (وده الأغلب) → ركّز على مشروع يعلمك مهارات تقنية حقيقية.

3 - التوازن بين الطموح والواقعية

فيه فريق بيختار فكرة ضخمة جدًا (Self-driving car, Drone معقدة…) وفي الآخر ما بيخلصوش غير شاسيه وليدات.
وفيه فريق بيخاف فيروح لفكرة بسيطة جدًا (LEDs بتنور).
الصح: اختار حاجة متوسطة، تقدر تنفذها بإيدك وتتعلم منها، حتى لو مش "مبهرة" في الشكل.

4 - الصراحة بين أعضاء التيم

كتير من المشاكل بتحصل عشان الناس مش واضحة من البداية.
واحد عايز Embedded، والتيم كله ماشي في AI → النتيجة خناقات وضياع وقت.
الحل: اتفقوا من الأول كل واحد عايز إيه، ولو مش مناسب، يغيّر التيم.

5 - عقدة الأردوينو

ناس كتير بتخاف تكتب "Arduino" في السي ڤي.
لكن الحقيقة: ممكن تبدأ بفكرة معمولة على أردوينو، وتعيد تنفيذها بنفسك من الصفر (Drivers, Layers, Architecture).
المهم إنك تفهم وتبني بإيدك، مش مجرد Copy-Paste.

أو فعلا تطبيق قوى جدا وانت مش محتاج تتعلم تعمل كل الLayers بنفسك تانى من الMCAL.. الخ

6 - الفكرة مش أهم من التفاصيل

في الإنترفيوهات، محدش هيسألك: "ليه اخترت Smart Home؟"
هيسألك: "كنت بتبعت الداتا إزاي؟ استخدمت أي بروتوكول؟ عملت إيه في الـDrivers؟"
يعني اللي يفرق فعلًا هو التفاصيل التقنية اللي اتعلمتها ونفذتها.

7 - نصايح سريعة

• ما تضيعش وقتك في البحث عن "فكرة جديدة" وخلاص. الأهم إنك تتعلم.

• أي فكرة ممكن تزوَّقها وتعرضها بشكل محترم للدكتور فماتقلقش.

• لو مشروع التخرج مش Embedded، اعرض أكبر مشروع Embedded عملته في الدبلومة أو الكورسات، أو أيا كان تخصصك.

• المهم في الآخر: مشروع شغال + تعلم حقيقي.

_________________________________________________________

الزتونة:

مشروع التخرج مش اختبار عبقرية، هو فرصة تتعلم وتثبت لنفسك إنك قادر تنفذ حاجة من أولها لآخرها.
ركز على التنفيذ، التفاصيل التكنيكال ،وتنظيم وقتك.
والأهم: ما تسيبش نفسك تغرق فى محاولة الابهار وتنسى المضمون.

 

_________________________________________ 

باقى التفاصيل موجودة فى الفيديو ده:

Youtube: Graduation Projects - Arabic

وكمان ترشيحات لمشاريع التخرج نفسها:

LinkedIn: Graduation Projects Compilation