Robot Mechanical Hand Design

مش معنى انى بتاع برمجة دلوقتى انى مش باحب الميكانيكا.. أنا باعشقها.. ودليل على كده وجودى فى قسم ميكاترونكس قبل ما أكون فى اتصالات

وكمهووس بالروبوتات، اشتركت مع أصدقاء ليا من قسم هندسة طبية وأنا فى سنة تانية كلية فى مشروع تخرجهم وكنت بس مسؤول عن الإيد دى

بغض النظر عن فكرة المشروع.. نشوف تفاصيل التصميم هنا..

الفكرة كلها انه لما يحصل شد يخلى الصباع يتحرك عشان يقفل بشكل يشبه شوية صوابعنا.

والحمد لله انها جت بعد محاولات مختلفة فى الروبوت ده:

Bluetooth Controlled Arm Robot - Arduino DIY

وللأسف كل ده ماكنش عندى الخبرة العملية الكافية انى أطلع شغل محترم أكتر وعلمى أحسن
كنت بس باعرف اتخيل وابحث واستخدم برنامج SolidWorks
وأدوات الحفر والطباعة وغيره

المحاولة رقم 1:

هدفها كان مجرد تحريك صوابع ايد ميكانيكية من تصميم يتقص بمكنة الليزر لشيت اكليريك

فخليت الصوابع الأساسية بسيرفو موتور والابهام بموتور تانى

طبعا محاولة بجحة قوى :D لكنها ادت الغرض فى الأول

وده شكل الحركة المتوقعة منه:

وجه وقت المحاولة رقم 2:

وهنا استهدفنا التصميم انه يكون مطبوع ثلاثى الأبعاد ويتيح التحكم بكل صباع لوحده.. اينعم التنفيذ الخاص بالمشروع برضه ربطوا الصوابع ببعض بس عملت اللى عليا :D